ເມືອງ ຫຼວງນໍ້າທາ ເປີດຊຸດຝຶກອົບຮົມກົດໝາຍ 45 ວັນ ໃຫ້ພະນັກງານຮາກຖານບ້ານ.

Primary tabs

          ໃນວັນທີ 27 ກໍລະກົດ 2021 ຢູ່ທີ່ ຫ້ອງການ ບ້ານໄຊສົມບຸນ ເມືອງ ຫຼວງນໍ້າທາ ແຂວງ ຫຼວງນໍ້າທາ ໄດ້ຈັດພິທີເປີດຊຸດຝຶກອົບຮົມກົດໝາຍຂັ້ນພື້ນຖານລະບົບບໍາລຸງ 45 ວັນ, ໃຫ້ພະນັກງານຮາກຖານບ້ານ ໃນເທດສະບານ ເມືອງ ຫຼວງນໍ້າທາ ແຂວງ ຫຼວງນໍ້າທາ ຊຸດທີ III ປະຈໍາປີ 2021 ຂຶ້ນ; ໂດຍການ ເປັນທານ ຂອງທ່ານ ຫຼ້າປະເສີດ ສີປະເສີດ ກໍາມະການປະຈໍາພັກແຂວງ ເລຂາພັກເມືອງ ເຈົ້າເມືອງ ຫຼວງນໍ້າທາ, ໃຫ້ກຽດເຂົ້າຮ່ວມໂດຍທ່ານ ນາງ ມາລີພອນ ນາບຸນແພງ ກໍາມະການພັກແຂວງ ຫົວໜ້າພະແນກຍຸຕິທໍາແຂວງ ຫຼວງນໍ້າທາ, ມີກໍາມະການພັກເມືອງ ,ຫົວໜ້າຫ້ອງການ, ຮອງຫົວໜ້າຫ້ອງການ, ພະນັກງານວິຊາການ ຫ້ອງການຍຸຕິທໍາເມືອງ, ແຂກຖືກເຊີນ ຄູຝືກ ແລະ ນັກຝຶກອົບຮົມເຂົ້າຮ່ວມທັງໝົດ 64 ທ່ານ, ຍິງ 34 ທ່ານ.
          ທ່ານ ຄໍາເຜີຍ ບຸດດີ ຫົວໜ້າຫ້ອງການຍຸຕິທໍາເມືອງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 260/ຈມ, ລົງວັນທີ 23 ກໍລະກົດ 2021 ວ່າດ້ວຍການເປີດຊຸດຝຶກອົບຮົມຄັ້ງນີ້ ຈຸດປະສົງແມ່ນເພື່ອເຮັດໃຫ້ພະນັກງານກຸ່ມບ້ານ ແລະ ອົງການຈັດຕັ້ງບ້ານຂັ້ນເມືອງ ໄດ້ຍົກລະດັບຄວາມຮູ້ທາງດ້ານກົດໝາຍໃຫ້ເປັນລະບົບ ສ້າງເງື່ອນໄຂໃຫ້ແກ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍໃຫ້ມີປະສິດທິພາບ ແລະ ປະສິດທິຜົນສູງ, ມີຄວາມສອດຄ່ອງ ກົມກຽວເປັນໄປຕາມລັດຖະທໍາມະນູນ ແລະ ກົດໝາຍ ພ້ອມກັນນັ້ນ ຍັງເປັນການຍົກສູງເຊີດຊູບົດບາດຄວາມສາມາດໃນການນໍາພາຂອງຄະນະພັກທຸກຂັ້ນ ໃຫ້ສູງຂຶ້ນເທື່ອລະກ້າວ, ເປົ້າໝາຍຜູ້ເຂົ້າຮ່ວມຊຸດຝຶກອົບຮົມ ພະນັກງານຮາກຖານບ້ານ, ມີອົງການຈັດຕັ້ງຂັ້ນບ້ານ, 8 ບ້ານ ເທດສະບານ ພາຍໃນອ້ອມຂ້າງເມືອງ ຫຼວງນໍ້າທາ ລວມທັງໝົດມີ: 59 ທ່ານ, ຍິງ 32 ທ່ານ. ປະກອບມີ 32 ວິຊາຮຽນ, ມີ 32 ກົດໝາຍ, ມີ 22,5 ໜ່ວຍກິດ ແລະ 360 ຊົ່ວໂມງ ໃຊ້ເວລາຮຽນທັງໝົດ 45 ວັນ ຈຶ່ງສໍາເລັດ.
          ໃນຕອນທ້າຍ ທ່ານ ຫຼ້າປະເສີດ ສີປະເສີດ ກໍາມະການປະຈໍາພັກແຂວງ ເລຂາພັກເມືອງ ເຈົ້າເມືອງ ຫຼວງນໍ້າທາ ໄດ້ມີຄໍາເຫັນໂອ້ລົມ ຕໍ່ຄະນະຮັບຜິດຊອບ, ຄູອາຈານຜູ້ສິດສອນ ຕະຫຼອດຮອດນັກຝຶກອົບຮົມ ຈົ່ງເອົາໃຈໃສ່ ຍົກສູງຄວາມຮັບຜິດຊອບຂອງຕົນ ໃຫ້ຕັ້ງໜ້າຈັດຕັ້ງຝຶກຝົນຫຼໍ່ຫຼອມການຮຽນ - ການສອນ, ຍົກສູງຄວາມຮັບຜິດຊອບ, ສະຕິເຄົາລົບ ແລະ ປະຕິບັດກົດໝາຍ ຢ່າງເຂັ້ມງວດ ເຮັດໃຫ້ການບໍລິຫານລັດດ້ວຍກົດໝາຍ ມີຄວາມໂປ່ງໃສ, ໂລ່ງລ່ຽນ ແລະ ມີປະສິດທີ່ພາບສູງ, ຮັບປະກັນຄວາມຍຸຕິທໍາໃນສັງຄົມ, ພົນລະເມືອງລາວທຸກຄົນຕ້ອງມີຄວາມສະເໜີພາບຕໍ່ໜ້າກົດໝາຍ ເພື່ອເຮັດໃຫ້ບັ້ນຝຶກອົບຮົມກົດໝາຍ 45 ຄັ້ງນີ້ ໃຫ້ບັນລຸຕາມຈຸດປະສົງ , ຮັບປະກັນທາງດ້ານຄຸນນະພາບ ແລະ ລະດັບຄາດໝາຍທີ່ໄດ້ວາງໄວ້.
ຖ່າຍພາບ ແລະ ຂຽນຂ່າວ: ຄໍາຮຸ່ງ ກຸໂພຄໍາ.
ປະເພດຂ່າວ: