ແຂວງ ຫຼວງນໍ້າທາ ເປີດຊຸດຝຶກອົບຮົມກົດໝາຍ 45 ວັນ.

          ໃນວັນທີ 24 ມິຖຸນາ 2021 ຜ່ານມາ ຢູ່ທີ່ ສະໂມສອນ ເມືອງ ລອງ ແຂວງ ຫຼວງນໍ້າທາ ໄດ້ຈັດພິທີເປີດຊຸດຝຶກອົບຮົມກົດໝາຍ 45 ວັນ, ໃຫ້ພະນັກງານພາຍໃນເທດສະບານຂອງເມືອງ ແລະ ກຸ່ມບ້ານ ພາຍໃນເມືອງ ລອງ ແຂວງ ຫຼວງນໍ້າທາ ຂຶ້ນ ໂດຍການເປັນປະທານຂອງ ທ່ານ ເພັດສະຫວັນ ຈິດດາລາ ຮອງເຈົ້າເມືອງ ລອງ ໃຫ້ກຽດເຂົ້າຮ່ວມໂດຍທ່ານ ນາງ ມາລີພອນ ນາບຸນແພງ ຫົວໜ້າພະແນກຍຸຕິທໍາແຂວງ ຫຼວງນໍ້າທາ ມີ ຫົວໜ້າ, ຮອງຫົວໜ້າຫ້ອງການຍຸຕິທໍາເມືອງ ລອງ, ພະນັກງານອ້ອມຂ້າງເມືອງ, ແຂກຖືກເຊີນ ຄູຝຶກ ແລະ ຜູ້ເຂົ້າຮ່ວມຝຶກອົບຮົມ ເຂົ້າຮ່ວມທັງໝົດ 81 ທ່ານ, ຍິງ 27 ທ່ານ.
อาจเป็นรูปภาพของ 3 คน และผู้คนกำลังยืน
          ທ່ານ ກອງແສງ ດວງສະຫວັນ ຫົວໜ້າຫ້ອງການຍຸຕິທໍາເມືອງ ລອງ ໄດ້ຜ່ານຂໍ້ຕົກລົງ ຂອງທ່ານເຈົ້າເມືອງ ສະບັບເລກທີ 209 /ຈມ, ລົງວັນທີ 17 ມິຖຸນາ 2021 ວ່າດ້ວຍ ການອະນຸມັດເປີດ ການຮຽນ-ການສອນ ກົດໝາຍໄລຍະສັ້ນ 45 ວັນ, ຊຶ່ງທ່ານ ໄດ້ກ່າວໃຫ້ຮູ້ວ່າ ການເປີດຊຸດຝຶກອົບຮົມຄັ້ງນີ້ ເພື່ອເຮັດໃຫ້ພະນັກງານຫຼັກແຫຼ່ງ ແລະ ອົງການຈັດຕັ້ງບ້ານພາຍໃນເມືອງ ໄດ້ຍົກລະດັບຄວາມຮູ້ທາງດ້ານກົດໝາຍ ໃຫ້ເປັນລະບົບພື້ນຖານເຂົ້າສູ່ລວງເລິກ ສ້າງເງື່ອນໄຂໃຫ້ແກ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍຢ່າງມີປະສິດທິພາບ ແລະ ປະສິດທິຜົນສູງ, ມີຄວາມສອດຄ່ອງ, ກົມກຽວ ຫັນໄປຕາມລັດຖະທໍາມະນູນ ແລະ ກົດໝາຍ, ພ້ອມນັ້ນ ຍັງເປັນການຍົກສູງເຊີດຊູບົດບາດຄວາມສາມາດໃນການນໍາພາຂອງຄະນະພັກທຸກຂັ້ນໃຫ້ສູງຂຶ້ນເທື່ອລະກ້າວ. ເປົ້າໝາຍ ຜູ້ເຂົ້າຮ່ວມຊຸດຝຶກອົບຮົມໃນຊຸດນີ້ ມີພະນັກງານ-ລັດຖະກອນ ອ້ອມຂ້າງເທດສະບານເມືອງ, ອົງການຈັດຕັ້ງກຸ່ມບ້ານເທດສະບານຂອງເມືອງ, ລວມທັງໝົດມີ 53 ທ່ານ, ຍິງ 21 ທ່ານ, ມີຄູຝຶກ 18 ທ່ານ, ປະກອບມີ 32 ວິຊາ, ມີ 32 ກົດໝາຍ, ມີ 22,5 ໜ່ວຍກິດ ແລະ 360 ຊົ່ວໂມງ ໃຊ້ເວລາຮຽນທັງໝົດ 45 ວັນ ຈຶ່ງຈະສໍາເລັດ, ຊຸດຝຶກອົບຮົມຊຸດນີ້ເປັນຊຸດທີ III ປະຈໍາປີ 2021.
          ໃນຕອນທ້າຍ ທ່ານ ປະທານ ກໍໄດ້ມີຄໍາເຫັນໂອ້ລົມຕໍ່ພິທີ ຊຶ່ງ ທ່ານ ໄດ້ເນັ້ນໜັກໃຫ້ຄະນະຮັບຜິດຊອບ, ຄູຝຶກ, ຜູ້ເຂົ້າຮ່ວມຝຶກອົບຮົມ ທຸກທ່ານ ຈົ່ງພ້ອມກັນເອົາໃຈໃສ່ຄົ້ນຄວ້າ ຊອກຮູ້ຮໍ່າຮຽນ ເປັນເຈົ້າການ ຍົກສູງຄວາມຮັບຜິດຊອບ ຕັ້ງໜ້າຝຶກຝົນຫຼໍ່ຫຼອມຕົນເອງ ເພື່ອເຮັດໃຫ້ຊຸດຝຶກອົບຮົມໃນຄັ້ງນີ້ບັນລຸຕາມຈຸດປະສົງ ແລະ ຮັບປະກັນຄຸນນະພາບຕາມລະດັບຄາດໝາຍ.
ຂ່າວ: ສຸມີໄຊ ວົງຕະສີ
ພາບ: ລັດຕະນາພອນ ນາບຸນແພງ
ປະເພດຂ່າວ: