ມອບ-ຮັບ ໜ້າທີ່ ຫົວໜ້າຫ້ອງການຍຸຕິທໍາ ເມືອງ ນາແລ ແຂວງ ຫຼວງນຳ້ທາ

          ພິທີມອບ-ຮັບ ໜ້າທີ່ ຫົວໜ້າຫ້ອງການຍຸຕິທໍາ ເມືອງ ນາແລ ໄດ້ຈັດຂຶ້ນ ໃນວັນທີ 25 ມິຖຸນາ 2021 ຜ່ານມາ ຢູ່ທີ່ຫ້ອງປະຊຸມ ຫ້ອງການຍຸຕິທໍາເມືອງ ນາແລ ແຂວງ ຫຼວງນໍ້າທາ ໂດຍການເປັນປະທານ ຂອງທ່ານ ບຸນປີ ໄລປະເສີດ ກໍາມະການພັກແຂວງ ເລຂາພັກເມືອງ ເຈົ້າເມືອງ ນາແລ, ໃຫ້ກຽດເຂົ້າຮ່ວມໂດຍທ່ານ ເພັດສະຫວັນ ສີພົມມະຈັນ ຮອງຫົວໜ້າພະແນກຍຸຕິທໍາແຂວງ , ມີບັນດາຫ້ອງການອ້ອມຂ້າງເມືອງ ແລະ ພະນັກງານວິຊາການ ພະແນກຍຸຕິທໍາແຂວງ, ຫ້ອງການຍຸຕິທໍາເມືອງ ເຂົ້າຮ່ວມ ທັງໝົດ 18 ທ່ານ, ຍິງ 6 ທ່ານ.
          ໃນພິທີດັ່ງກ່າວ ທ່ານ ບົວເງິນ ດວງປະເສີດ ຮອງຫົວໜ້າຫ້ອງການຍຸຕິທໍາເມືອງ ນາແລ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 146 / ຈມ, ລົງວັນທີ 26 ພຶດສະພາ 2021 ວ່າດ້ວຍການອະນຸມັດ ໃຫ້ພະນັກງານ ອອກພັກຜ່ອນ ຮັບນະໂຍບາຍອຸດໜູນບໍານານ . ຈາກນັ້ນ, ທ່ານ ໄໝ່ພົມ ໄຊຍະວົງ ກໍໄດ້ຜ່ານບົດສະຫຼຸບໂດຍຫຍໍ້ ໃນການຈັດຕັ້ງປະຕິບັດໜ້າທີ່ວຽກງານ ໃນໄລຍະຜ່ານມາ ແລະ ເຊັນບົດບັນທຶກ ມອບ-ຮັບ ໜ້າທີ່ ລະຫວ່າງ ທ່ານ ໄໝ່ພົມ ໄຊຍະວົງ ຫົວໜ້າຫ້ອງການຍຸຕິທໍາເມືອງ ນາແລ (ຜູ້ເກົ່າ) ແລະ ທ່ານ ບົວເງິນ ດວງປະເສີດ ຮອງຫົວໜ້າຫ້ອງການຍຸຕິທໍາ ເມືອງ ນາແລ (ຮັກສາການຜູ້ໃໝ່).
          ຕອນທ້າຍພິທີ ກໍ່ໄດ້ຮັບຟັງການໂອ້ລົມ ຂອງທ່ານ ບຸນປີ ໄລປະເສີດ ກໍາມະການພັກແຂວງ ເລຂາພັກເມືອງ ເຈົ້າເມືອງ ນາແລ ຊຶ່ງທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ຂອງຫົວໜ້າຫ້ອງການຍຸຕິທໍາເມືອງ ຜູ້ເກົ່າ ທີ່ຍາດແຍ່ງມາໄດ້ໃນໄລຍະຜ່ານມາ ແລະ ໄດ້ເນັ້ນໜັກໃຫ້ ທ່ານ ຜູ້ຮັກສາການ ຫົວໜ້າຫ້ອງການຍຸຕິທໍາ ຜູ້ໃໝ່ ຈົ່ງເອົາໃຈໃສ່ ສຶກສາອົບຮົມການເມືອງ-ແນວຄິດ ໃຫ້ພະນັກງານ-ລັດຖະກອນ ຂອງຫ້ອງການຍຸຕິທໍາ ໃຫ້ມີຄວາມໜັກແໜ້ນ, ເພີ່ມທະວີແບບແຜນວິທີນໍາພາ, ເຮັດວຽກເປັນໝູ່ຄະນະ ປະຕິບັດຫຼັກການລວມສູນປະຊາທິປະໄຕ ສຽງສ່ວນໜ້ອຍ ຂຶ້ນກັບສຽງສ່ວນຫຼາຍ, ມີຄວາມຮັບຜິດຊອບສູງຕໍ່ໜ້າທີ່ວຽກງານ ທີ່ພັກ-ລັດໄດ້ມອບໝາຍໃຫ້ໃນແຕ່ລະໄລຍະ.
ຂຽນຂ່າວ: ຄໍາຮຸ່ງ ກຸໂພຄໍາ
ຖ່າຍພາບ: ສຸມີໄຊ ວົງຕະສີ.