ຫ້ອງການຍຸຕິທຳເມືອງ ຮຸນ ລົງໂຄສະນາເຜີຍແຜ່ເອກະສານສໍາຄັນໃຫ້ກຸ່ມ ນາຊຽງດີ ແລະ ນໍ້າຢືງ

          ໃນວັນທີ 22 ມິຖຸນາ 2021 ຜ່ານມາ ທ່ານ ພອນປະເສີດ ພັນທະວົງ ຮອງຫົວໜ້າຫ້ອງການຍຸຕິທຳ ເມືອງ ຮຸນ ແຂວງ ອຸດົມໄຊ ພ້ອມດ້ວຍຄະນະ ໄດ້ລົງເຄື່ອນໄຫວໂຄສະນາເຜີຍແຜ່ເອກະສານສໍາຄັນ ຂອງຂະແໜງຍຸຕິທໍາ ໃຫ້ປະຊາຊົນ ຢູ່ກຸ່ມບ້ານ ນາຊຽງດີ ແລະ ບ້ານ ນໍ້າຢືງ ມີ ພະນັກງານ-ລັດຖະກອນຈາກຫ້ອງການຍຸຕິທໍາເມືອງ, ນາຍບ້ານ ແລະ ປະຊາຊົນທັງສອງບ້ານເຂົ້າຮ່ວມຮັບຟັງທັງໝົດ 74 ຄົນ, ຍິງ 36 ຄົນ.
          ຈຸດປະສົງໃນການໂຄສະນາເຜີຍແຜ່ເອກະສານໃນຄັ້ງນີ້ ເພື່ອເຮັດໃຫ້ປະຊາຊົນພາຍໃນສອງບ້ານ ໄດ້ຮັບຮູ້, ເຂົ້າໃຈຕໍ່ແນວທາງນະໂຍບາຍຂອງພັກ, ລັດຖະທຳມະນູນ, ກົດໝາຍ ແລະ ລະບຽບການຂອງລັດ ທີ່ວາງອອກ, ມີຜົນສັກສິດ ແລະ ປະກາດໃຊ້ແຕ່ລະໄລຍະ; ຮັບຮູ້ ແລະ ເຂົ້າໃຈ ສິດ, ໜ້າທີ່, ຂັ້ນຕອນ, ວິທີການແກ້ໄຂຂໍ້ຂັດແຍ່ງຂັ້ນບ້ານ; ຂັ້ນຕອນ ແລະ ວິທີການປະເມີນຄອບຄົວ ແລະ ບ້ານແບບຢ່າງປະຕິບັດກົດໝາຍ.
          ເອກະສານທີ່ນໍາມາເຜີຍແຜ່ຄັ້ງນີ້ ປະກອບມີ: ດຳລັດຂອງນາຍົກລັດຖະມົນຕີ ສະບັບເລກທີ 77/ລບ, ລົງວັນທີ 28 ກຸມພາ 2018 ວ່າດ້ວຍການຊ່ວຍເຫຼືອທາງດ້ານກົດໝາຍໂດຍບໍ່ເສຍຄ່າ; ຄຳແນະນຳຂອງລັດຖະມົນຕີກະຊວງຍຸຕິທໍາ ສະບັບເລກທີ 1077/ກຍ, ລົງວັນທີ 3 ກັນຍາ 2018 ວ່າດ້ວຍການຈັດຕັ້ງປະຕິບັດ ການຊວ່ຍເຫຼືອທາງດ້ານກົດໝາຍ, ຈັດຕັ້ງໂຕະໃຫ້ການຊ່ວຍເຫຼືອທາງດ້ານກົດໝາຍເຄື່ອນທີ່ ແລະ ຂໍ້ຕົກລົງຂອງລັດຖະມົນຕີກະຊວງຍຸຕິທໍາ ສະບັບເລກທີ 2399/ກຍ, ລົງວັນທີ 7 ທັນວາ 2017 ວ່າດ້ວຍການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ໃຫ້ກຽດເຜີຍແຜ່ເອກະສານໂດຍ ທ່ານ ພອນປະເສີດ ພັນທະວົງ ຮອງຫົວໜ້າຫ້ອງການຍຸຕິທຳ ເມືອງ ຮຸນ
          ໃນຕອນທ້າຍ ທ່ານ ຮອງຫົວໜ້າຫ້ອງການຍຸຕິທຳ ເມືອງ ຮຸນ ກໍໄດ້ມີຄຳເຫັນໂອ້ລົມ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຄະນະໂຄສະນາເຜີຍແຜ່ຂອງຫ້ອງການຍຸຕິທໍາເມືອງ, ອົງການປົກຄອງບ້ານ ແລະ ປະຊາຊົນທັງສອງບ້ານ ທີ່ເຂົ້າຮ່ວມຮັບຟັງການໂຄສະນາເຜີຍແຜ່ເອກະສານໃນຄັ້ງນີ້ ແລະ ທ່ານຍັງໄດ້ເນັ້ນໜັກໃຫ້ປະຊາຊົນຈົ່ງມີສະຕິຕື່ນຕົວເຄົາລົບປະຕິບັດຕາມລັດຖະທຳມະນູນ ແລະ ກົດໝາຍໃຫ້ເຂັ້ມງວດ, ພ້ອມກັນສ້າງຄອບຄົວ ແລະ ບ້ານຂອງຕົນໃຫ້ເປັນບ້ານແບບຢ່າງປະຕິບັດກົດໝາຍໃນຕໍ່ໜ້າ.
ຂຽນຂ່າວ:ນາງ ພູຄໍາ ຫັດສະດີ
ຖ່າຍພາບ: ກັນຫາ ອີນສົມພອນ
ປະເພດຂ່າວ: