ຫ້ອງການຍຸຕິທໍາເມືອງ ຮຸນ ປະກາດການແຕ່ງຕັ້ງຫົວໜ້າໜ່ວຍງານ

          ພິທີປະກາດແຕ່ງຕັ້ງຫົວໜ້າໜ່ວຍງານ ໄດ້ຈັດຂຶ້ນ ວັນທີ 30 ມິຖຸນາ 2021 ຜ່ານມາ ຢູ່ທີ່ຫ້ອງປະຊຸມ ຫ້ອງການຍຸຕິທຳເມືອງ ຮຸນ ແຂວງ ອຸດົມໄຊ ໂດຍການເປັນປະທານຂອງ ທ່ານ ຄຳກອງ ຕິດຕະວົງ ກຳມະການພັກເມືອງ ຫົວໜ້າຄະນະຈັດຕັ້ງເມືອງຮຸນ, ມີທ່ານ ວິໄຊເຮີ ພັນດາລີ ຫົວໜ້າຫ້ອງການຍຸຕິທຳເມືອງ ຮຸນ ພ້ອມດ້ວຍພະນັກງານ-ລັດຖະກອນເຂົ້າຮ່ວມທັງໝົດ 13 ທ່ານ, ຍິງ 4 ທ່ານ.
          ໃນພິທີ ທ່ານ ນະຄອນ ແສງທອງຄຳ ຕາງໜ້າຄະນະຈັດຕັ້ງເມືອງ ຮຸນ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ຮຸນ ສະບັບເລກທີ 188/ຈມ.ມຮ, ລົງວັນທີ 2 ມິຖຸນາ 2021 ວ່າດ້ວຍການແຕ່ງຕັ້ງ ທ່ານ ກັນຫາ ອິນສົມພອນ ຮອງຫົວໜ້າໜ່ວຍງານສົ່ງເສີມວຽກງານຍຸຕິທໍາ ເປັນຫົວໜ້າໜ່ວຍງານສົ່ງເສີມວຽກງານຍຸຕິທຳ, ຫ້ອງການຍຸຕິທຳເມືອງ ຮຸນ.
          ໃນຕອນທ້າຍ ທ່ານ ຄຳກອງ ຕິດຕະວົງ ຫົວໜ້າຄະນະຈັດຕັ້ງເມືອງ ຮຸນ ກໍໄດ້ມີຄຳເຫັນໂອ້ລົມຕໍ່ພິທີ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຜົນງານໃນການປັບປຸງແຜນກຳນົດພະນັກງານນຳພາ-ຄຸ້ມຄອງ ຂອງຄະນະຫ້ອງການຍຸຕິທໍາເມືອງ ຮຸນ ແລະ ສາມາດບັນລຸຕາມແຜນການທີ່ວາງໄວ້ ແລະ ໄດ້ເນັ້ນໜັກໃຫ້ຜູ້ທີ່ໄດ້ຮັບການແຕ່ງຕັ້ງໜ້າທີ່ໃໝ່ ຈົ່ງຕັ້ງໃຈເຮັດວຽກຕາມສິດ ແລະ ໜ້າທີ່ຂອງຕົນ, ມີຄວາມສາມັກຄີພາຍໃນ ແລະ ພາຍນອກ, ມີຄວາມເສຍສະລະເພື່ອຜົນປະໂຫຍດສ່ວນລວມ, ມີແບບແຜນວິທີເຮັດວຽກໃຫ້ລະອຽດ, ຊອກຮູ້ແລກປ່ຽນບົດຮຽນກັບຜູ້ທີ່ມີປະສົບການມາກ່ອນ, ເຊື່ອໝັ້ນຕໍ່ການຊີ້ນຳ-ນຳພາຂອງຄະນະຫ້ອງການ ໃນການຈັດຕັ້ງປະຕິບັດໜ້າທີ່ວຽກງານທີ່ຕົນຮັບຜິດຊອບ ໃຫ້ສຳເລັດຕາມການມອບໝາຍຂອງຄະນະຫ້ອງການ ແລະ ຂັ້ນເທິງ.
ຂຽນຂ່າວ: ກັນຫາ ອິນສົມພອນ
ຖ່າຍພາບ: ແຊ່ນ ວິລະບຸດ
ປະເພດຂ່າວ: