ພິທີປິດຊຸດຝຶກອົບຮົມກົດໝາຍໄລຍະສັ້ນ 45 ວັນ ຊຸດທີ V ປີ 2020 ຢູ່ເມືອງ ທ່າໂທມ ແຂວງ ໄຊສົມບູນ

Primary tabs

ໃນຕອນເຊົ້າຂອງວັນທີ່ 26 ພະຈິກ 2020 ຢູ່ທີ່ສະໂມສອນເມືອງ ທ່າໂທມ, ແຂວງ ໄຊສົມບູນ ໄດ້ມີພິທີປິດການຮຽນ-ການສອນ ກົດໝາຍໄລຍະສັ້ນ 45 ວັນ ຂຶ້ນໂດຍການເປັນປະທານຂອງ ທ່ານ ພິມພາ ນິລາວົງ ກຳມະການພັກແຂວງ ເລຂາພັກເມືອງ ເຈົ້າເມືອງ ທ່າໂທມ , ເຂົ້າຮ່ວມຂອງ ທ່ານ ລືຢ່າງ ຫວັງເຢັງ ຮອງຫົວໜ້າພະແນກຍຸຕິທຳແຂວງ. ມີ ທ່ານ ວົງຊິວ ສາຍສະຫວັນ ຄະນະປະຈຳພັກເມືອງ ຫົວໜ້າກອງບັນຊາການທະຫານເມືອງ ຜູ້ຊີ້ນຳວຽກງານຍຸຕິທຳເມືອງ , ມີກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການອ້ອມຂ້າງເມືອງ, ຄະນະຮັບຜິດຊອບ, ຄູ-ອາຈານ ແລະ ນັກຝຶກອົບຮົມເຂົ້າຮ່ວມທັງໝົດ 95 ທ່ານ ຍິງ 23 ທ່ານ.

ທ່ານ ບູນຜອງ ຄຳມີໄຊ ກຳມະການພັກເມືອງ ຫົວໜ້າຫ້ອງການຍຸຕິທຳເມືອງ ໄດ້ຂຶ້ນຜ່ານຂໍ້ຕົກລົງວ່າດ້ວຍການອະນຸມັດ ປິດຊຸດຝຶກອົບຮົມກົດໝາຍໄລຍະສັ້ນ 45 ວັນ ຊຸດທີ V ປີ 2020 ແລະ ຜ່ານບົດສະຫຼຸບ ການຝຶກອົບຮົມກົດໝາຍໄລຍະສັ້ນ 45 ວັນ ຊຸດທີ V ປີ 2020 ເຊິ່ງໄດ້ເປິດການຮຽນແຕ່ວັນທີ 10 ກັນຍາ 2020 – 26 ພະຈິກ 2020 ໃຊ້ເວລາຮຽນທັງໝົດ 45 ວັນ. ໃນຊຸດຝຶກອົບຮົມຄັ້ງນີ້ ມີພະນັກງານຫຼັກແຫຼ່ງຂັ້ນເມືອງ ແລະ ຂັ້ນບ້ານເຂົ້າຮ່ວມທັງໝົດ 47 ທ່ານ, ຍິງ 8 ທ່ານ ຖ້າທຽບໃສ່ແຜນທີ່ວາງໄວ້ ແມ່ນລື່ນຄາດໝາຍ ໃນນີ້: ມີພະນັກງານຈາກສຳນັກງານອົົງການເມືອງອ້ອມຂ້າງ 28 ທ່ານ, ຍິງ 7 ທ່ານ, ກຳມະການພັກເມືອງ 2 ທ່ານ, ຫົວໜ້າຄະນະຫ້ອງການ 3 ທ່ານ, ຍິງ 1 ທ່ານ; ຈາກກຳລັງປ້ອງກັນຊາດ, ປ້ອງກັນຄວາມສະຫງົບ 5 ທ່ານ, ພະນັກງານ-ລັດຖະກອນທີ່ເປັນສະມາຊິກພັກທີ່ມີຕຳແໜ່ງຫົວໜ້າ, ຮອງຫົວໜ້າໜ່ວຍງານ ເປົ້າໝາຍພະນັກງານສືບທອດປ່ຽນແທນຂອງບັນດາຫ້ອງການ 25 ທ່ານ, ຍິງ 6 ທ່ານ ແລະ ມາຈາກຂັ້ນບ້ານ 19 ທ່ານ, ຍິງ 1 ທ່ານ ຕໍາແໜ່ງເລຂາພັກບ້ານ-ນາຍບ້ານ 2 ທ່ານ, ຮອງນາຍບ້ານ 3 ທ່ານ, ແລະ ຂະແໜງການຂອງບ້ານ 14 ທ່ານ, ຍິງ 1 ທ່ານ.

ໃນພິທີໄດ້ມີການມອບໃບຊົມເຊີຍໃຫ້ແກ່ບຸກຄົນ ໃນການປະກອບສ່ວນວຽກງານການຝຶກອົບຮົມກົດໝາຍໄລຍະສັ້ນ 45 ວັນ ຂອງເມືອງ ທ່າໂທມ ມີຈຳນວນ 29 ທ່ານ, ມອບໃບກຽດຕິຄຸນໃຫ້ແກ່ຜູ້ໃຫ້ການສະໜັບສະໜູນວັດຖຸປັດໄຈເຂົ້າໃນວຽກງານຝຶກອົບຮົມ ຈຳນວນ 2 ທ່ານ, ມອບໃບຊົມເຊີຍໃຫ້ແກ່ບຸກຄົນ ໃນການປະກອບສ່ວນໜ້າທີ່ວຽກງານຝຶກອົບຮົມຈຳນວນ 90 ທ່ານ.

ໃນຕອນທ້າຍທ່ານ ພິມພາ ນິລາວົງ ປະທານກອງປະຊຸມໄດ້ໃຫ້ກຽດ ໂອ້ລົມຕໍ່ກອງປະຊຸມ: ກ່ອນອື່ນໝົດທ່ານກໍ່ໄດ້ຍ້ອງຍໍຊົມເຊີຍຕໍ່ຜົນສໍາເລັດຂອງການຈັດຕັ້ງຝຶກອົບຮົມກົດໝາຍໃນຄັ້ງນີ້ ແລະ ໄດ້ເນັ້ນໜັກໃຫ້ບັນດາສຳມະນາກອນທີ່ໄດ້ອົບຮົມກົດໝາຍ, ພາຍຫຼັງກັບສູ່ກົມກອງ, ຫ້ອງການ, ຮາກຖານບ້ານ ຈົ່ງນໍາເອົາບົດຮຽນ ແລະ ເນື້ອໃນຈິດໃຈຂອງກົດໝາຍທີ່ໄດ້ຝືກອົບຮົມມານັ້ນໄປຈັດຕັ້ງປະຕິບັດເຂົ້າໃນໜ້າທີ່ວຽກງານ ໃນຂອບເຂດຄວາມຮັບຜິດຊອບຂອງຕົນໃຫ້ປະກົດຜົນເປັນຈິງ.

ຖ່າຍພາບ, ຂຽນຂ່າວ: ຫົງທອງ ອຸ່ນທະວີສັກ

ປະເພດຂ່າວ: