ກອງປະຊຸມກວດກາຄວາມສອດຄ່ອງຂອງຮ່າງກົດໝາຍວ່າດ້ວຍ ການຄຸ້ມຄອງໜີ້ສິນສາທາລະນະ ໄດ້ຈັດຂຶ້ນທີ່ຫ້ອງປະຊຸຸມຂອງກະຊວງຍຸຕິທຳ ໃນຕອນເຊົ້າຂອງວັນທີ 30 ມັງກອນ 2018. ໂດຍການເປັນປະທານຮ່ວມຂອງ ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ ແລະ ທ່ານ ນ. ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນ, ມີຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ ແລະ ພະນັກງານວິຊາການກົດໝາຍຂອງສອງກະຊວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
    ການຄຸ້ມຄອງໜີ້ສິນສາທາລະນະ ແມ່ນການຈັດຕັ້ງປະຕິບັດມາດຕະການກ່ຽວກັບວຽກງານໜີ້ສິນສາທາລະນະ ແລະ ການນຳໃຊ້ແຫຼ່ງທຶນໃຫ້ຖືກຕ້ອງຕາມກົດໝາຍ, ລະບຽບການ ແລະ ສັນຍາ ເພື່ອຮັບປະກັນສະຖຽນລະພາບທາງດ້ານການເງິນ ແລະ ເສດຖະກິດແຫ່ງຊາດ. ສຳລັບຮ່າງກົດໝາຍວ່າດ້ວຍ ການຄຸ້ມຄອງໜີ້ສິນສາທາລະນະ ແມ່ນໄດ້ນຳເຂົ້າທາບທາມຄຳເຫັນຂອງສະມາຊິກສະພາແຫ່ງຊາດ ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ 8 ທີ່ຜ່ານມາ ແລະ ຈະນຳເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ 8 ທີ່ຈະເປີດຂຶ້ນໃນທ້າຍເດືອນ ເມສາ ຫາ ພຶດສະພາ ທີ່ຈະມາເຖິງນີ້,ຊຶ່ງໄດ້ປັບປຸງຮ່າງກົດໝາຍຈາກ 14 ພາກ, 4 ໝວດ, 70 ມາດຕາ ມາເປັນ 12 ພາກ, 7 ໝວດ, 74 ມາດຕາ ແລະ ໄດ້ຄົ້ນຄວ້າຕັດອອກ, ກຳນົດເພີ່ມ ແລະ ສັບຊ້ອນເນື້ອໃນຂອງບາງມາດຕາ ມາເປັນມາດຕະການສະເພາະຕື່ມ ເພື່ອໃຫ້ເນື້ອໃນຂອງຮ່າງກົດໝາຍສະບັບດັ່ງກ່າວນີ້ ມີຄວາມຄົບຖ້ວນ, ສົມບູນ, ຮັດກຸມ ແລະ ສາມາດຈັດຕັ້ງປະຕິບັດໄດ້ໃນພາກປະຕິບັດຕົວຈິງ.

ຂ່າວ: ສີປະໄພ, ພາບ: ສຸກສາຄອນ