Submitted by wickyboubphalyvanh on
ໂດຍອີງຕາມແຈ້ງການ ສະບັບເລກ 74/ກຍ.ຄຊປປລ, ລົງວັນທີ 08 ທັນວາ 2017 ວ່າດ້ວຍການປຸກລະດົມວັດຖຸປັດໄຈເພື່ອຊ່ວຍເຫຼືອຜູ້ປະສົບໄພນ້ຳຖ້ວມຢູ່ ສສ ຫວຽດນາມ ແລະ ຕ້ານໄພໜາວຢູ່ເຂດຫ່າງໄກສອກຫຼີກ ຢູ່ ສປປ ລາວ ແລະ ອີງຕາມແຈ້ງການກ່ຽວກັບ ການຮ່ວມປະກອບສ່ວນບໍລິຈາກເຄື່ອງນຸ່ງຫົ່ມ ແລະ ອຸປະກອນຮັບໃຊ້ ເພື່ອຊ່ວຍເຫຼືອສັງຄົມ.
ໃນຕອນບ່າຍຂອງວັນທີ 10 ມັງກອນ 2018 ໜ່ວຍຊາວໜຸ່ມ ກົມສົ່ງເສີມລະບົບຍຸຕິທຳ ໄດ້ຈັດພິທີມອບເຄື່ອງຊ່ວຍເຫຼືອ ແລະ ປັດໄຈຈຳນວນໜຶ່ງເພື່ອຊ່ວຍເຫຼືອຜູ້ປະສົບໄພນ້ຳຖ້ວມຢູ່ ສສ ຫວຽດນາມ ແລະ ຕ້ານໄພໜາວຢູ່ເຂດຫ່າງໄກສອກຫຼີກຂອງ ສປປ ລາວ. ພິທີດັ່ງກ່າວໄດ້ຈັດຂຶ້ນທີ່ ກົມສົ່ງເສີມລະບົບຍຸຕິທຳ ກະຊວງຍຸຕິທຳ; ໃຫ້ກຽດມອບເຄື່ອງ ແລະ ວັດຖຸປັດໃຈໃນຄັ້ງນີ້ ໂດຍ ທ່ານ ປອ ຈອມຄຳ ບຸບຜາລີວັນ ຫົວໜ້າກົມສົ່ງເສີມລະບົບຍຸຕິທຳ ແລະ ຮັບໂດຍ ທ່ານ ຄຳເສີດ ວິລະພັນ ຮອງຫົວໜ້າກົມຈັດຕັ້ງ-ພະນັກງານ, ມີສະມາຊິກໜ່ວຍຊາວໜຸ່ມຂອງທັງສອງກົມເຂົ້າຮ່ວມຢ່າງພ້ອມພຽງ, ຊຶ່ງເຄື່ອງທີ່ນຳມາມອບໃນຄັ້ງນີ້ປະກອບມີເຄື່ອງນຸ່ງຫົ່ມຈຳນວນໜຶ່ງ ແລະ ເງິນຈຳນວນ 300.000 ກີບ ເພື່ອປະກອບສ່ວນຊ່ວຍເຫຼືອສັງຄົມ ກໍຄືຊ່ວຍເຫຼືອຜູ້ທີ່ໄດ້ຮັບຜົນກະທົບຈາກໄພທຳມະຊາດທັງ ຢູ່ ສສ ຫວຽດນາມ ແລະ ສປປ ລາວ.
ຂ່າວ: ປາວີຄຳ ເພັດທະລາກຸນ
ພາບ: ສຸກສາຄອນ ຈັນທະວຸດ