Submitted by xaiyphimphone on
ຊຸດຝຶກອົບຮົມຜູ່ປະສານງານ ວຽກງານຈົດໝາຍເຫດທາງລັດຖະການໃນລະບົບເອເລັກໂຕຣນິກ 8 ແຂວງພາກເໜືອ ໄດ້ຈັດຂຶ້ນ ລະຫວ່າງ ວັນທີ 3-5 ພຶດສະພາ 2016 ທີ່ໂຮງແຮມວັງທອງ ແຂວງຫຼວງພະບາງ ໂດຍການເປັນປະທານຂອງ ທ່ານ ວົງສະຫວັນ ເທບພະຈັນ ຄະນະປະຈຳພັກແຂວງ ຮອງເຈົ້າແຂວງ ແຂວງຫຼວງພະບາງ, ມີຜູ່ເຂົ້າຮ່ວມທັງໝົດ 43 ທ່ານ, ຍິງ 8 ທ່ານ ຊຶ່ງມາຈາກ ຫ້ອງວ່າການປົກຄອງແຂວງ ແລະ ພະແນກຍຸຕິທຳແຂວງ ຫຼວງພະບາງ, ຜົ້ງສາລີ, ຫຼວງນໍ້າທາ, ບໍ່ແກ້ວ, ອຸດົມໄຊ, ຫົວພັນ, ຊຽງຂວາງ ແລະ ໄຊຍະບູລີ.
ຈຸດປະສົງຂອງການຝຶກອົບຮົມໃນຄັ້ງນີ້ ເພື່ອຍົກສູງຄວາມສຳຄັນຂອງຈົດໝາຍເຫດທາງລັດຖະການ ໃຫ້ແກ່ຜູ່ປະສານງານທີ່ມາຈາກ 8 ແຂວງ ໄດ້ຮັບຮູ້ ແລະ ເຂົ້າໃຈ ກ່ຽວກັບຜົນສັກສິດຂອງນິຕິກຳ, ວິທີການສົ່ງ ແລະ ໄຈ້ແຍກນິຕິກຳ ແລະ ຂັ້ນຕອນການເຂົ້າຊົມໃຊ້ເວບໄຊຈົດໝາຍເຫດທາງລັດຖະການການ, ການເກັບໂຮມເອົາກົດໝາຍ, ນິຕິກຳຕ່າງໆລົງໃນເວບໄຊລວມສູນໄວ້ບ່ອນດຽວ ແຕ່ຂັ້ນສູນກາງລົງຮອດທ້ອງຖິ່ນ ໃຫ້ມີຜົນສັກສິດ. ທັງເປັນການສ້າງເງື່ອນໄຂ ແລະ ອຳນວຍຄວາມສະດວກໃຫ້ແກ່ຜູ່ມີຄວາມສົນໃຈ, ບັນດາສາທາລະນະຊົນ, ລວມທັງນັກທຸລະກິດໄດ້ຮັບຮູ້, ເຂົ້າໃຈ ບັນດາກົດໝາຍ ແລະ ນິຕິກຳຕ່າງໆ ທັງສາມາດເຂົ້າເຖິງຂໍ້ມູນຂ່າວສານທາງກົດໝາຍໄດ້ງ່າຍຂຶ້ນ.
ຊຸດຝຶກອົບຮົມໃນຄັ້ງນີ້ ໄດ້ເນັ້ນໃຫ້ຜູ່ປະສານງານຂັ້ນແຂວງ ເອົາໃຈໃສ່ຈັດຕັ້ງປະຕິບັດວຽກງານຈົດໝາຍເຫດທາງລັດຖະການ ໃຫ້ມີປະສິດທິຜົນ. ນອກຈາກນັ້ນ, ຍັງເຮັດໃຫ້ຜູ່ປະສານງານ ຮັບຮູ້ສິດ ແລະ ພາລະບົດບາດຂອງຕົນ, ໃນການເປັນເຈົ້າການເກັບໂຮມນິຕິກຳທີ່ຢູ່ໃນຄວາມຮັບຜິດຊອບຂອງອົງການຕົນ ນຳມາຈັດພິມລົງໃນຈົດໝາຍເຫດທາງລັດຖະການ, ເຮັດໃຫ້ບັນດານິຕິກຳເຫຼົ່ານັ້ນ ມີຜົນສັກສິດຕາມກົດໝາຍ. ຊຸດຝຶກອົບຮົມ ໄດ້ດຳເນີນໄປເປັນ ເວລາ ສາມ ວັນ ໃນນັ້ນ ຜູ່ຮັບຜິດຊອບວຽກງານຕົວຈິງໄດ້ຂຶ້ນບັນລະຍາຍ ເອກະສານຕ່າງໆ ທີ່ມີຄວາມສຳຄັນ ແລະ ຕິດພັນໂດຍກົງກັບການຄຸ້ມຄອງບໍລິຫານວຽກງານຈົດໝາຍເຫດທາງລັດຖະການ. ໃນນັ້ນ, ໄດ້ມີການແລກປ່ຽນບົດຮຽນ ແລະ ຖາມ-ຕອບບັນຫາຕ່າງໆທີ່ເຫັນວ່າຜູ່ເຂົ້າຮ່ວມຍັງບໍ່ທັນເຂົ້າໃຈແຈ້ງ ເພື່ອຄວາມເປັນເອກະພາບໃນການຈັດຕັ້ງປະຕິບັດວຽກງານດັ່ງກ່າວ. ພ້ອມກັນນັ້ນ, ຍັງເຮັດໃຫ້ບັນດາທ່ານ ຜູ່ທີ່ໄດ້ຮັບການແຕ່ງຕັ້ງ ເປັນຜູ່ປະສານງານກັບໜ່ວຍງານຈົດໝາຍເຫດທາງລັດຖະການນັ້ນ ໄດ້ຮັບຮູ້ ແລະ ມີຄວາມເຂົ້າໃຈເປັນເອກະພາບກັນ ກ່ຽວກັບວິທີການຮີບໂຮມ, ການໄຈ້ແຍກນິຕິກຳທີ່ມີຜົນບັງຄັບທົ່ວໄປ ແລະ ນິຕິກຳທີ່ມີຜົນບັງຄັບສະເພາະ, ວິທີສົ່ງບັນດານິຕິກຳຂອງແຂວງ ມາໃຫ້ໜ່ວຍງານຈົດໝາຍເຫດທາງລັດຖະການ.
ໃນຕອນທ້າຍຂອງການຝຶກອົບຮົມ ທ່ານ ປອ. ເສີມສຸກ ສີມພະວົງ ຮອງລັດຖະມົນຕີກະຊວງຍຸຕິທຳ ກໍໄດ້ເນັ້ນຕື່ມອີກ ເຖິງຜູ່ປະສານງານທີ່ມາຈາກ 8 ແຂວງພາກເໜືອ ບໍ່ວ່າວຽກງານດັ່ງກ່າວຈະມີຄວາມຫຍຸ້ງຍາກພຽງໃດກໍຕາມ ຂໍໃຫ້ບັນດາທ່ານພ້ອມກັນຜ່ານຜ່າຂໍ້ຫຍຸ້ງຍາກເຫຼົ່ານັ້ນໄປໃຫ້ໄດ້. ພ້ອມກັນນຳເອົາເນື້ອໃນຈິດໃຈຂອງຊຸດຝຶກອົບຮົມໃນຄັ້ງນີ້ກັບໄປຈັດຕັ້ງປະຕິບັດໃນແຂວງຂອງຕົນໃຫ້ໄດ້ຮັບປະສິດທິຜົນສູງຂຶ້ນເລື້ອຍໆ./.