Submitted by wickyboubphalyvanh on
ໃນຕອນເຊົ້າຂອງວັນທີ 29 ມິຖຸນາ 2018 ພະແນກຍຸຕິທໍາແຂວງ ຫຼວງພະບາງ ໄດ້ຈັດພິທີປິດການຮຽນ - ການສອນກົດໝາຍຊັ້ນຕົ້ນ ຊຸດທີ VII ປະຈຳປີ 2018 ຢູ່ທີ່ຫ້ອງປະຊຸມໃຫຍ່ເທດສະບານເມືອງ ງອຍ ແຂວງ ຫຼວງພະບາງ ໂດຍການເປັນປະທານຂອງທ່ານ ຄຳດີ ຈິດຕະປັນຍາ ຮອງເລຂາພັກເມືອງ ປະທານແນວລາວສ້າງຊາດເມືອງ, ເຂົ້າຮ່ວມ ມີທ່ານ ມີໄຊ ໄຊເກີຢ່າຈົ່ງຕົວ ຫົວໜ້າພະແນກຍຸຕິທໍາແຂວງ ຫຼວງພະບາງ, ມີຫົວໜ້າຫ້ອງການຍຸຕິທຳເມືອງ, ທ່ານຜູ້ຕາງໜ້າຈາກຫ້ອງການອ້ອມຂ້າງເມືອງ ແລະ ນັກສຳມະນາກອນ ເຂົ້າຮຽນທັງໝົດ 64 ຄົນ, ຍິງ 17 ຄົນ.
ໃນພິທີທ່ານ ສຸລິພອນ ໂສຕາປະເສີດ ຫົວໜ້າຫ້ອງການຍຸຕິທຳເມືອງ ງອຍ ໄດ້ສະຫຼຸບລາຍງານຜົນສຳເລັດການຈັດຕັ້ງປະຕິບັດຫຼັກສູດການຮຽນກົດໝາຍຊັ້ນຕົ້ນ 3 ເດືອນ ຊຸດທີ VII ປະຈຳປີ 2018 ຊຶ່ງການຮຽນ-ການສອນກົດໝາຍຊັ້ນຕົ້ນ ແມ່ນຈັດໃຫ້ສະເພາະພະນັກງານຫຼັກແຫຼ່ງຂອງຂະແໜງການອ້ອມຂ້າງເມືອງ, ເລຂາພັກບ້ານ, ນາຍບ້ານ ຂອງເມືອງງອຍ, ການຮຽນ-ການສອນດັ່ງກ່າວ ແມ່ນໄດ້ນຳເອົາບາງກົດໝາຍໃນ 4 ຂົງເຂດມາສິດສອນ ຜ່ານການຮຽນກົດໝາຍຊັ້ນຕົ້ນເຮັດໃຫ້ສຳມະນາກອນຮັບຮູ້, ເຂົ້າໃຈ ແລະ ເຄື່ອນໄຫວວຽກງານໃຫ້ຖືກຕ້ອງຕາມພາລະບົດບາດ, ສິດ ແລະ ໜ້າທີ່ຂອງຕົນ, ແນ່ໃສ່ເຮັດໃຫ້ກຸ່ມບ້ານ ແລະ ຮາກຖານບ້ານມີການພັດທະນາ, ມີຄວາມສະຫງົບ ມີຄວາມເປັນລະບຽບຮຽບຮ້ອຍໂດຍພື້ນຖານ ແລະ ສາມາດກາຍເປັນບ້ານແບບຢ່າງໃນການປະຕິບັດກົດໝາຍ.
ຫຼັງຈາກນັ້ນ ໃນພິທີ ກໍໄດ້ມີການມອບໃບປະກາສະນິຍະບັດໃຫ້ແກ່ຜູ້ສຳເລັດການຮຽນກົດໝາຍຊັ້ນຕົ້ນ ຈຳນວນ 31 ຄົນ, ຍິງ 13 ຄົນ ໂດຍທ່ານ ມີໄຊ ໄຊເກີຢ່າຈົ່ງຕົວ ຫົວໜ້າພະແນກຍຸຕິທຳແຂວງ ຫຼວງພະບາງ ພ້ອມດຽວກັນນັ້ນ ກໍໄດ້ມີການມອບໃບຍ້ອງຍໍໃຫ້ແກ່ຄະນະຊີ້ນຳ, ຄະນະຮັບຜິດຊອບ, ຄູ-ອາຈານ ແລະ ນັກສຳມະນາກອນຜູ້ທີ່ຮຽນດີ-ຮຽນເກັ່ງ ຈຳນວນທັງໝົດ 23 ທ່ານ, ຍິງ 6 ທ່ານ ໃຫ້ກຽດມອບໂດຍທ່ານ ຄຳດີ ຈິດຕະປັນຍາ ຮອງເລຂາພັກເມືອງ ປະທານແນວລາວສ້າງຊາດເມືອງ.
ໃນຕອນທ້າຍຂອງພິທີທ່ານ ຄຳດີ ຈິດຕະປັນຍາ ຮອງເລຂາພັກເມືອງ ປະທານແນວລາວສ້າງຊາດເມືອງ ກໍໄດ້ໃຫ້ກຽດໂອ້ລົມຕໍ່ພິທີ ຊຶ່ງທ່ານໄດ້ກ່າວຍ້ອງຍໍຊົມເຊີຍ ຄະນະຮັບຜິດຊອບ, ຄູ-ອາຈານ ແລະ ນັກສຳມະນາກອນ ທີ່ໄດ້ເອົາໃຈໃສ່ໃນການສິດສອນ ແລະ ຄົ້ນຄວ້າຮ່ຳຮຽນຈົນສຳເລັດ ແລະ ທ່ານຍັງໄດ້ເນັ້ນໜັກໃຫ້ນັກສຳມະນາກອນ ຈົ່ງນຳເອົາຄວາມຮູ້, ຄວາມສາມາດທີ່ໄດ້ຮຽນມາໄປຜັນຂະຫຍາຍເຂົ້າໃນໜ້າທີ່ວຽກງານໃນຂອບເຂດທີ່ຕົນເອງຮັບຜິດຊອບໃຫ້ເກີດຜົນປະໂຫຍດສູງສຸດ.
ຂຽນຂ່າວ: ນາງ ມະໄລກອນ ທໍ່ ປັບປຸງຂ່າວ: ອ່ອນຄຳ