Submitted by wickyboubphalyvanh on
ພິທີປາຖະກະຖາ 3 ວັນສຳຄັນປະຫວັດສາດຄື: ລະນຶກວັນຄ້າຍວັນເກີດຂອງ ທ່ານ ປະທານ ສຸພານຸວົງ ຄົບຮອບ 107 ປີ (13 ກໍລະກົດ 1909-13 ກໍລະກົດ 2016), ວັນສ້າງຕັ້ງສະຫະພັນແມ່ຍິງລາວ ຄົບຮອບ 61 ປີ ແລະ ວັນເຊັນສົນທິສັນຍາມິດຕະພາບ-ການຮວ່ມມື ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ໄດ້ຈັດຂຶ້ນໃນວັນທີ່ 21 ກໍລະກົດ 2016 ທີ່ກະຊວງຍຸຕິທຳ ໃຫ້ກຽດເຂົ້າຮວ່ມ ແລະ ປາຖະກະຖາຂອງ ທ່ານ ປອ ເສີມສຸກ ສີມພະວົງ ຮອງລັດຖະມົນຕີກະຊວງຍຸຕິທຳ ມີບັນດາຄະນະພັກ, ຄະນະນຳ ແລະ ພະນັກງານ-ລັດຖະກອນ ກະຊວງຍຸຕິທຳ ເຂົ້າຮ່ວມຮັບຟັງຢ່າງພ້ອມພຽງ.
ໃນພິທີ ທ່ານ ປອ ເສີມສຸກ ສີມພະວົງ ໄດ້ເລົ່າຄືນເຖິງມູນເຊື້ອຊີວິດ ແລະ ການເຄື່ອນໄຫວປະຕິວັດຂອງ ທ່ານ ປະທານ ສຸພານຸວົງ ຊຶ່ງຕະຫຼອດຊີວິດແຫ່ງການເຄື່ອນໄຫວປະຕິວັດ ທ່ານໄດ້ອຸທິດເລືອດເນື້ອ ແລະ ສະຕິປັນຍາ, ຫົວຄິດປະດິດສ້າງເຂົ້າໃນພາລະກິດຕໍ່ສູ້ກູ້ຊາດ. ທ່ານ ສຸພານຸວົງ ແມ່ນຜູ້ໜຶ່ງທີ່ຄວາມຮັກຊາດຢ່າງດູດດື່ມ, ມີຈິດໃຈຕໍ່ສູ້ທີ່ອາດຫານກ້າແກ່ນ ແລະ ມີນ້ຳໃຈເສຍສະຫຼະອັນສູງສົ່ງເພື່ອປະເທດຊາດ ແລະ ປະຊາຊົນ ຈົນສາມາດນຳພາປະເທດຊາດຍາດໄດ້ເອກະລາດ ອະທິປະໄຕ ແລະ ຜືນແຜ່ນດິນອັນຄົບຖ້ວນ ແລະ ນຳເອົາຄວາມສົມບູນພູນສຸກມາສູ່ປະຊາຊົນບັນດາເຜົ່າຈົນເຖິງປັດຈຸບັນ. ພ້ອມກັນນັ້ນ, ທ່ານ ໄດ້ປາຖະກາຖາຫວນຄືນປະຫວັດມູນເຊື້ອການກຳເນີດ, ການເຕີບໃຫ່ຍຂະຫຍາຍຕົວ ແລະ ຜົນງານການເຄື່ອນໄຫວຂອງສະຫະພັນແມ່ຍິງ ແລະ ແມ່ຍິງລາວບັນດາເຜົ່າທີ່ໄດ້ອຸທິດຕົນເພື່ອພາລະກິດຕໍ່ສູ້ປົດປ່ອຍຊາດ ແລະ ປົກປັກຮັກສາພັດທະນາປະເທດຊາດ ກໍຄືພາລະກິດພັດທະນາແມ່ຍິງຕະຫຼອດໄລຍະ 61 ປີ ໂດຍຄ່ຽງບ່າຄຽງໄລ່ກັບເພດຊາຍ ແລະ ໃນຕອນທ້າຍຜູ້ເຂົ້າຮວ່ມຍັງໄດ້ຮັບຟັງກຽ່ວກັບການກຳເນີດ ແລະ ເຕີບໃຫ່ຍຂະຫຍາຍຕົວຂອງຄວາມສາມັກຄີແບບພິເສດ ລະຫວ່າງ 2 ຊາດລາວ-ຫວຽດນາມ ທີ່ມີມູນເຊື້ອຊວ່ຍເຫຼືອເຊີ່ງກັນ ແລະ ກັນມາແຕ່ດົນນານ ໃນການກໍ່ຕັ້ງ ແລະ ປົກປັກຮັກສາປະເທດຊາດຂອງໃຜລາວ ໂດຍສະເພາະ ແມ່ນໃນໄລຍະດຳເນີນການຕໍ່ສູ້ປະຕິວັດເປັນເວລາເຄິ່ງສັດຕະວັດ ພາຍໃຕ້ການນຳພາຂອງພັກຄອມມູນິດອິນດູຈີນ ກໍຄືພັກປະຊາຊົນປະຕິວັດລາວ ໄດ້ເພີ່ມຄວາມສາມັກຄີຊວ່ຍເຫຼືອເຊີ່ງກັນ ແລະ ກັນຢ່າງແໜ້ນແຟ້ນ ແລະ ໄດ້ຮັບໄຊຊະນະທຸກດ້ານ ນຳເອົາຄວາມສົມບູນພູນສຸກມາສູ່ປະຊາຊົນສອງຊາດລາວ-ຫວຽດນາມ. ສະນັ້ນ, ພະນັກງານ-ລັດຖະກອນ ກໍຄືປະຊາຊົນບັນດາເຜົ່າຮຸ່ນສືບທອດ ຈົ່ງຮ່ຳຮຽນເອົາແບບຢ່າງ 3 ມູນເຊື້ອປະຫວັດສາດນີ້ເພື່ອນຳມາໜູນໃຊ້ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ./.
ຂຽນຂ່າວ ແລະ ຮູບພາບໂດຍ: ວຽງໄຊ ແກ້ວວິໄລໃສສະຫງ່າ (ນັກຂ່າວກົມໂຄສະນາອົບຮົມກົດໝາຍ)