Submitted by superuser on
ໃນວັນທີ 23 ມີນາ 2016, ເວລາ 11: 00ໂມງ ທີ່ຫ້ອງແຂກກະຊວງຍຸຕິທຳ, ທ່ານ ບຸນເກີດ ສັງສົມສັກ ລັດຖະມົນຕີກະຊວງຍຸຕິທຳ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຢາມຂອງ ທ່ານ ນາງ ໂກດີນ ເລີດູ ( Clau dineLEDOUX ) ເອກອັກຄະລັດຖະທູດຝຣັ່ງ ປະຈຳ ສປປ ລາວ ພ້ອມດ້ວຍຄະນະ. ຈຸດປະສົງຂອງການຢ້ຽມຢາມໃນຄັ້ງນີ້ ແມ່ນເພື່ອປຶກສາຫາລືກ່ຽວການຈັດກອງປະຊຸມວ່າດ້ວຍບົດບາດຂອງທະນາຍຄວາມ ແລະ ທ່ານ ລັດຖະມົນຕີກະຊວງຍຸຕິທຳ ກໍໄດ້ສະເໜີຂໍທຶນການສຶກສາລະດັບປະລີນຍາເອກໃຫ້ແກ່ພະນັກງານກະຊວງຍຸຕິທຳ ແຫ່ງ ສປປ ລາວ.
ໃນໂອກາດດັ່ງກ່າວ ທ່ານ ບຸນເກີດ ສັງສົມສັກ ລັດຖະມົນຕີກະຊວງຍຸຕິທຳ ກໍໄດ້ຕ້ອນຮັບ ທ່ານ ນາງໂກລດີນ ເລີດູ ຢ່າງອົບອຸ່ນ ຊຶ່ງການມາຢ້ຽມຢາມໃນຄັ້ງນີ້ເປັນການປະກອບສ່ວນອັນສຳຄັນໃນການຮັດແໜ້ນສາຍພົວພັນຮ່ວມມື ລະຫ່ວາງ ກະຊວງຍຸຕິທຳ ແຫ່ງ ສປປ ລາວ ແລະ ສະຖານທູດຝຣັ່ງ ໃຫ້ມີບາດກ້າວຂະຫຍາຍຕົວຂຶ້ນໄປ ເລື້ອຍໆ ແລະ ທ່ານ ນາງ ໂກລດີນ ເລີດູ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງ ທ່ານລັດຖະມົນຕີກະຊວງຍຸຕິທຳ ແຫ່ງ ສປປລາວ.
ໃນຕອນບ່າຍເວລາ 14 : 00 ໂມງ ຂອງວັນດຽວກັນ ທີ່ຫ້ອງຮັບແຂກກະຊວງຍຸຕິທຳ ທ່ານ ເກດ ກຽດຕິສັກ ຮອງລັດຖະມົນຕີກະຊວງຍຸຕິທຳ ແຫ່ງ ສປປ ລາວ ກໍໄດ້ຕ້ອນຮັບການເຂົ້າຢ້ຽມຢາມຂອງ ທ່ານ ນາງ ໂກລດີນ ເລີດູ ເອກອັກຄະລັດຖະທູດຝຣັ່ງ ປະຈຳ ສປປ ລາວ ເພື່ອມາປຶກສາຫາລືກ່ຽວກັບການຮັບເອົາເດັກນ້ອຍມາເປັນລູກລ້ຽງ.
ໃນໂອກາດດັ່ງກ່າວ ທ່ານ ຮອງລັດຖະມົນຕີກະຊວງຍຸຕິທຳ ແຫ່ງ ສປປ ລາວ ກໍໄດ້ຕ້ອນຮັບຢ່າງອົບອຸ່ນຕໍ່ການເຂົ້າຢ້ຽມຢາມຂອງ ທ່ານ ນາງ ໂກລດີນ ເລີດູ ແລະ ທ່ານ ນາງໂກລ ເລີດູ ກໍໄດ້ກ່າວສະແດງຄວາມຂອບໃຈຕໍ່ ການຕ້ອນຮັບດັ່ງກ່າວ./.