Submitted by wickyboubphalyvanh on
ອີງຕາມຜົນການພົບປະຢ້ຽມຢາມຂອງ ຄະນະບັນນາທິການ ໜັງສືພິມກົດໝາຍ ແຫ່ງ ສສ ຫວຽດນາມ, ຄັ້ງວັນທີ 24 ກຸມພາ 2017 ທີ່ຜ່ານມາ ຊຶ່ງຄະນະບັນນາທິການໜັງສືພິມກົດໝາຍແຫ່ງ ສສ ຫວຽດນາມ ໄດ້ເຫັນດີໃຫ້ການຊ່ວຍເຫຼືອອຸປະກອນຮັບໃຊ້ຈຳນວນໜຶ່ງ ແກ່ວຽກງານໜັງສືພິມຂອງກະຊວງຍຸຕິທຳ ແຫ່ງ ສປປ ລາວ. ສະນັ້ນ, ໃນຕອນບ່າຍຂອງວັນທີ 09 ມັງກອນ 2018 ທີ່ກົມໂຄສະນາເຜີຍກົດໝາຍ ກະຊວງຍຸຕິທຳ ໄດ້ຈັດພິທີມອບ-ຮັບ ອຸປະກອນທີ່ໄດ້ຈາກການຊ່ວຍເຫຼືອຂອງຄະນະບັນນາທິການ ໜັງສືພິມກົດໝາຍ ແຫ່ງ ສສ ຫວຽດນາມຂຶ້ນ ໂດຍໃຫ້ກຽດເຂົ້າຮ່ວມໃນພິທີຂອງ ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ, ມີ ທ່ານ ຄຳພອນ ສີປະເສີດ ຫົວໜ້າຫ້ອງກະຊວງຍຸຕິທຳ, ທ່ານ ພູທອນ ແກ້ວດວງມະນີ ຫົວໜ້າກົມໂຄສະນາເຜີຍກົດໝາຍ, ມີບັນດາທ່ານຮອງຫົວໜ້າກົມ, ຫົວໜ້າພະແນກ, ຜູ້ຕາງໜ້າຈາກກົມຮ່ວມມືສາກົນ, ຜູ້ຕາງໜ້າຈາກພະແນກການເງິນ ແລະ ສາມອົງການຈັດຕັ້ງມະຊາຊົນຂອງກົມໂຄສະນາເຜີຍກົດໝາຍເຂົ້າຮ່ວມ.
ໃນພິທີ ທ່ານ ຄຳພອນ ສີປະເສີດ ຫົວໜ້າຫ້ອງການ ໄດ້ຂຶ້ນມອບອຸປະກອນດັ່ງກ່າວຕາງໜ້າໃຫ້ແກ່ ຄະນະບັນນາທິການ ໜັງສືພິມກົດໝາຍ ແຫ່ງ ສສ ຫວຽດນາມ ແລະ ຕາງໜ້າຮັບໂດຍ ທ່ານ ພູທອນ ແກ້ວດວງມະນີ ຫົວໜ້າກົມໂຄສະນາເຜີຍກົດໝາຍ, ຊຶ່ງເຄື່ອງທີ່ໄດ້ຮັບການຊ່ວຍເຫຼືອໃນຄັ້ງນີ້ປະກອບມີ: ຄອມພິວເຕີຕັ້ງໂຕະ 03 ເຄື່ອງ; ຄອມພິວເຕີໂນດບຸກ 02 ເຄື່ອງ; ປຼິນເຕີ 01 ໜ່ວຍ; ຮາດດິດ 02 ອັນ; ໝໍ້ເກັບໄຟ 02 ໜ່ວຍ; ໄມໄວເລດ 01 ອັນ; ຂາກ້ອງວີດີໂອ 02 ອັນ; ມຶກປຼິນເຕີ 1 ອັນ ແລະ ແອນຕີໄວຣັສ 03 ອັນ ລວມມູນຄ່າທັງໝົດເປັນເງິນ 40.500.000 ກີບ. ຫຼັງຈາກນັ້ນ ທ່ານ ປອ. ເສີມສຸກ ສິມພະວົງ ຮອງລັດຖະມົນຕີກະຊວງຍຸຕິທຳ ກໍໄດ້ກ່າວຄຳເຫັນຕໍ່ພິທີ ຊຶ່ງທ່ານໄດ້ສະແດງຄວາມຂອບໃຈຕໍ່ ຄະນະບັນນາທິການ ໜັງສືພິມກົດໝາຍ ສສ ຫວຽດນາມ ທີ່ໄດ້ການຊ່ວຍເຫຼືອໃນຄັ້ງນີ້ ແລະ ທ່ານ ຍັງເນັ້ນໜັກໃຫ້ກົມໂຄສະນາເຜີຍກົດໝາຍ ຈົ່ງພ້ອມກັນນຳເອົາເຄື່ອງທີ່ໄດ້ຮັບການຊ່ວຍເຫຼືອໃນຄັ້ງນີ້ ໄປນຳໃຊ້ເຂົ້າໃນການເຄື່ອນໄຫວວຽກງານໃຫ້ເກີດປະສິດທິຜົນສູງສຸດ ແລະ ເອົາໃຈໃສ່ປົກປັກຮັກສາເພື່ອໃຫ້ສາມາດນຳໃຊ້ໄດ້ຢ່າງຍາວນານ.
ຂ່າວ: ປາວີຄຳ ເພັດທະລາກຸນ
ພາບ: ສົມຫວັງ ບົວລະພັນ